Batys Qazaqstan oblysyndaǵy Samara – Shymkent tasjolynda eki jeńil kólik soqtyǵysyp, eki adam qaza tapty, dep habarlaıdy Egemen.kz.
Oqıǵa 19 jeltoqsan kúni saǵat 10:05 shamasynda atalǵan joldyń 270-shaqyrymynda bolǵan. BQO Polısııa departamenti taratqan málimetke sáıkes, «VAZ-2112» kóliginiń júrgizýshisi basqarý júıesine ıe bola almaı, qarsy baǵytqa shyǵyp ketken. Saldarynan ol qarsy kele jatqan «Volkswagen Passat» kóligimen qatty soqtyǵysqan.
Soqqynyń kúshti bolǵany sonshalyq, «VAZ» júrgizýshisi men «Volkswagen» jolaýshysy jedel járdem jetkenshe jan tásilim etti. Sonymen qatar «Volkswagen» kóliginde bolǵan taǵy úsh adam (júrgizýshi men eki jolaýshy) aýyr jaraqattarmen aýrýhanaǵa jóneltildi.
Qazir polısııa qyzmetkerleri apattyń tolyq mán-jaıyn zerttep, tıisti saraptamalardy taǵaıyndady.